Монголын Аялал жуулчлалын холбооны гүйцэтгэх захирал Д.Отгонбаяр болон тус холбооны дотоод маркетинг хариуцсан менежер Н.Өлзийнаран нар 1-р сарын 7-ны өдөр тус төлөөлөгчийн газарт зочлон, Тайваниас Монгол Улсад суугаа төлөөлөгч Грэйс Ж.Р.Лүө-тэй уулзах үеэрээ Тайваний Төлөөлөгчийн газраас сүүлийн жилүүдэд Тайвань Монголын аялал жуулчлалын салбар дахь хамтын ажиллагааг хөгжүүлэхэд оруулсан хувь нэмэрийг өндрөөр үнэлж, хүндэт талархал гардуулахын зэрэгцээ төлөөлөгч Грэйс Ж.Р.Лүө-тэй цаашдын хамтын ажиллагааны асуудлаар санал солилцов.
Монголын Аялал жуулчлалын холбооны гүйцэтгэх захирал Д.Отгонбаяр хэлэхдээ “Өнгөрсөн 2019 онд Тайваниас ирсэн жуулчдын тоо хурдацтай өссөн, Монгол орноос Тайванийг зоригчдын тоо ч өнгөрсөн онуудаас өссөн үзүүлэлттэй байна.” гэв. Сүүлийн жилүүдэд талуудын аялал жуулчлалын салбар дахь харилцаа, хамтын ажиллагааг өргөжүүлэх зорилгоор хичээн ажиллаж, бодит үр дүн, амжилт гаргаж чадсан Тайваний төлөөлөгчийн газрын хамт олонд Монголын Аялал жуулчлалын холбооноос энэхүү хүндэт талархалыг гардуулсан болно. Тус холбооны зүгээс цаашид ч талуудын аялал жуулчлалын салбар дахь хамтын ажиллагааг бэхжүүлэн, хоёр орны ард иргэдийн харилцан ойлголцлыг улам бүр гүнзгийрүүлж ажиллана гэж найдаж буйгаа илэрхийлэв.
Төлөөлөгч Грэйс Ж.Р.Лүө нь Монголын Аялал жуулчлалын холбооны зүгээс төлөөлөгчийн газрын явуулж буй үйл ажиллагааг өндрөөр үнэлж буйд талархаж буйгаа илэрхийлэхийн сацуу талуудын хоорондын аялал жуулчлалын салбар дахь харилцаа, хамтын ажиллагааг цаашид улам бүр өргөжүүлэх нь зүйтэй хэмээн онцлов. Тэрээр мөн Монгол орны хил залгаа болон ойр орчмын улс орнууд тухайлбал Япон, Солонгос, ОХУ зэрэг улс орнууд Тайваний иргэдийг визгүй зорчих эсвэл газрын виз болон цахим виз мэдүүлэн зорчих визны хөнгөлөлттэй нөхцөлөөр зорчуулах болсон тул Тайваний жуулчид эдгээр орнуудыг зорих нь эрс нэмэгдсэн болохыг дурьдав. Үүний зэрэгцээ Тайваний иргэд гадаад улс орнуудад зорчихдоо тухайн газар орныхоо хууль дүрмийг чанд сахин биелүүлдэг тул Монгол орны аялал жуулчлалын салбарынхан Тайвань жуулчдыг татах нь зөв зүйтэй явдал юм.
Монгол Улс Тайваний иргэдийг визгүй зорчих эсвэл газрын виз болон цахим виз мэдүүлэн зорчих визны хөнгөлөлттэй нөхцөлөөр зорчуулах тухай шийдвэр гаргавал Монгол оронд зочлох Тайваний жуулчдын тоо эрс нэмэгдэх нь дамжиггүй юм.
Тайваниас Монгол Улсад суугаа төлөөлөгч Грэйс Ж.Р.Лүө нь Монголын Аялал жуулчлалын холбооны гүйцэтгэх захирал Д.Отгонбаярыг хүлээн авч уулзав.
Монголын Аялал жуулчлалын холбооны гүйцэтгэх захирал Д.Отгонбаяр ньТайваниас Монгол Улсад суугаа төлөөлөгч Грэйс Ж.Р.Лүө-д хүндэт талархал гардуулав.