Тайваниас Монголд суугаа Төлөөлөгчийн газар болон Тайваний Хүүхэд гэр бүлийг дэмжих сангийн Монгол дахь салбар хамтран энэ сарын 15-ны өдөр Улаанбаатар хотын 6 том дүүргийн 102 өрх айлд дулаан хөнжил бэлэглэлээ. Монголд үйлдвэрлэсэн энэхүү тэмээний ноосон хөнжил нь тэдгээр айл өрхөд хахир өвлийг өнтэй дулаан давахад нь туслана хэмээн найдаж байна.
Хандивын үйл ажиллагааг Тайваний Хүүхэд гэр бүлийг дэмжих сангийн хурлын танхимд зохион байгуулж, Тайваний Төлөөлөгчийн газрын төлөөлөгч хатагтай Грэйс Ж.Р.Лүө ба Хөдөлмөр, халамж үйлчилгээний ерөнхий газрын ажилчид хүрэлцэн ирж энэхүү үйл ажиллагаанд оролцов. Тайваний Хүүхэд гэр бүлийг дэмжих сангийн тэргүүн хатагтай Жоу Мэймиао хэлсэн үгэндээ Тайваний Төлөөлөгчийн газрын төлөөлөгч, хатагтай Грэйс Ж.Р.Лүө хахир өвлийн хүйтэнд Монголчуудад илч дулаан бэлэглэхийг хүсч нэн шаардлагатай айл өрхөд ийнхүү дулаан хөнжил хандивлаж буйд талархал илэрхийлэв.
Харин Төлөөлөгч, хатагтай Грэйс Ж.Р.Лүө хэлэхдээ “Тайвань газар нутгийн хувьд Монголоос алслагдмал хэдий ч зүрх сэтгэлээрээ Монголын найзуудтайгаа ойр дотно оршдог” хэмээв. Тэрээр өнгөрсөн оны 12 сарын 16-ны өдөр Монголд ирсэн бөгөөд тухайн үед агаарын хэм -26°хүйтэн байв. Ингээд ийм хахир хүйтнийг амьжиргааны түвшин доогуур айл өрхүүд хэрхэн давах вэ? хэмээн санаа зовниж Хүүхэд гэр бүлийг дэмжих сангийн тэргүүнтэй холбогдож нэн шаардлагатай гэж үзэж буй айл өрхүүдийг олж өгнө үү хэмээн тусламж хүсэн, Төлөөлөгчийн газраас дулаан хөнжил хандивлажээ. Мөн тэрээр Тайвань Монгол хоёр тал нийгмийн халамж, боловсрол, эрүүл мэнд зэрэг салбаруудад нягт харилцаатайг тодотгож, Хүүхэд гэр бүлийг дэмжих сангийн гүйцэтгэж буй үүрэг, хичээл зүтгэл, хувь нэмэрт талархаж буйгаа илэрхийллээ.
Дулаан хөнжил хүлээн авсан иргэн өөрийн сэтгэгдлээ хуваалцаж, өөрийн бие муутай охин, 3 зээ нарын хамт амьдардгаа дурьдаад,“Хүүхэд гэр бүлийг дэмжих санд ирээд 3 жил болж байна. Энэхүү санд ирснээс хойш түүний амьдралд томоохон өөрчлөлт гарсан. Том зээ нь сургуульд, хоёр бага нь нэг нь найман сартай, нэг нь цэцэрлэгт. Хүйтэн өвлийг өнтэй дулаан давахад тусалж буй Тайваньчуудын халуун сэтгэлд маш их баярлалаа!” хэмээн талархсан сэтгэлээ илэрхийлэв. Мөн 6 хүүхэдтэй ээж Тайваний Төлөөлөгчийн газрын тусламж дэмжлэгт талархаж буйгаа илэрхийлээд дулаан хөнжлөө хүүхдүүддээ нөмрүүлж унтуулна хэмээн ярилаа.
Энэхүү хандивын үйл ажиллагаанд Сонгинохайрхан, Баянзүрх, Хан-Уул, Сүхбаатар, Чингэлтэй, Баянгол зэрэг зургаан том дүүргийн айл өрхүүд ирж оролцсон ба тэдгээрийн 1/3-ийг гэр хорооллын оршин суугчид голчилдог Сонгинохайрхан дүүргийн иргэд эзэлж байв.
