Сүүлийн жилүүдэд Тайваний эмнэлгүүд болон төрийн бус байгууллагууд Монгол Улсын хамтран ажилладаг эмнэлгүүд болон байгууллагуудад эмнэлгийн тоног төхөөрөмж хандивлаж, Монгол орны ард иргэдийн эрүүл энх, сайн сайхны төлөө халамж, анхаарал хандуулж буйгаа батлан харуулсаар байна. Эдгээр байгууллагуудын дундаас Тайваний Жан Хуа Христийн шашны эмнэлэг маш идэвхитэй үйл ажиллагаа явуулж байна. Тухайлбал 2018 онд 30 ширхэг урьд нь ашиглагдаж байсан эмнэлгийн зориулалтын ор, эмэгтэйчүүдийн төрөх ор зэрэг эмнэлгийн хэрэглэгдэхүүн хандивласан бол 2019 онд Эрдэнэт хот, 2020 онд Жэй Си Эс олон улсын байгууллагад /Joint Christian Service, JCS International/ тус бүр нэг ширхэг зөөврийн эхо оношилгооны аппарат хандивлажээ.
Эхо оношилгооны аппаратыг хүлээлгэн өгөх арга хэмжээ 1-р сарын 30-ны өдөр Улаанбаатар хотод байрлах Жэй Си Эс олон улсын байгууллага /Joint Christian Service, JCS International/ дээр зохиогдсон төдийгүй Тайваниас Монгол Улсад суугаа төлөөлөгч Грэйс Ж.Р.Лүө энэхүү хандивын арга хэмжээнд уригдан оролцож, Жан Хуа Христийн шашны эмнэлгийн нэрийн өмнөөс эхо оношилгооны аппаратыг хүлээлгэн өгөв.
Тайваниас Монгол Улсад суугаа төлөөлөгч Грэйс Ж.Р.Лүө хэлсэн үгэндээ “Жан Хуа Христийн шашны эмнэлэг нь олон улсын эрүүл мэндийн үйлчилгээний чиглэлээр маш идэвхитэй ажилласаар ирсэн төдийгүй сүүлийн жилүүдэд Монгол Улсад халамж анхааралаа хандуулж, өөрийн нөөцөөс хувиарлах болсон билээ. Энэ удаа тус эмнэлэг нь эхо оношилгооны аппаратаа Жэй Си Эс олон улсын байгууллагад хандивлан, тус байгууллага алслагдмал аймаг суманд эмнэлгийн үзлэг оношилгоо хийх үйл хэрэгт нь дэмжлэг үзүүлэхээр боллоо” гэв. Төлөөлөгч Грэйс Ж.Р.Лүө цааш хэлсэн үгэндээ Жэй Си Эс олон улсын байгууллага нь Монгол Улсад 25-аас дээш жил идэвхитэй үйл ажиллагаа явуулж, сайн дурын үндсэн дээр бусдын төлөө өрнүүлсэн үйл хэргээр бахархах сэтгэл төрөхийн зэрэгцээ талархаж буйгаа мөн илэрхийлэв.
Жэй Си Эс олон улсын байгууллага /Joint Christian Service, JCS International/ нь анх 1993 онд Монгол Улсад байгуулагдсан ба одоогийн гүйцэтгэх захирлаар Нидерланд улсын иргэн хатагтай Элизабет Менсерт Лангендейк /Elisabeth Mensert-Langendijk/ ажиллаж байна. Тэрээр Тайваний Жан Хуа Христийн шашны эмнэлэг хандив өргөж, сайн үйл хийж буйд чин сэтгэлийн угаас талархаж буйгаа илэрхийлэв.
Төлөөлөгч Грэйс Ж.Р.Лүө нь Тайваний Жан Хуа Христийн шашны эмнэлгийн үүсгэн байгуулагчдын нэг болох Шотландын иргэн, номлогч Дэвид Ландсборо /David Landsborough/-ийн гэргий Мажори Лернер /Majorie Learner/ тус эмнэлэгт эмчлүүлж байсан гүн түлэгдэлтийн шархтай хүүд өөрийн хөлнөөс дөрвөн хэсэг арьс шилжүүлэн суулгахаар өгч байсан тухай сэтгэл хөдөлгөм түүхийг хуваалцсан бөгөөд хатагтай Элизабет Менсерт Лангендейк Тайваний Жан Хуа Христийн шашны эмнэлгийн энэрэнгүй нигүүлсэнгүй үзэл санааны тухай сонсоод сэтгэл хөдлөж буйгаа илэрхийлээд, цаашид тус эмнэлэгтэй илүү ойр нягт хамтран ажиллана гэж найдаж байна хэмээв.
Фото зургийн тайлбар: Тайваниас Монгол Улсад суугаа төлөөлөгч Грэйс Ж.Р.Лүө нь хандив хүлээн авагч байгууллага болох Жэй Си Эс олон улсын байгууллага /Joint Christian Service, JCS International/-ын гүйцэтгэх захирал хатагтай Элизабет Менсерт Лангендейк болон тус байгууллагын стратеги, хамтын ажиллагаа хариуцсан захирал Лха. Алтанхуяг нартай дурсгалын зураг татуулав.