Нордхоффын гавал, нүүрний сан нь Тайваний Чан Гэн эмнэлэгтэй хамтран Монгол Улсын Эх, хүүхдийн эрүүл мэндийн үндэсний төвд уруул, тагнайн сэтэрхийн эмгэгтэй хүүхэд багачуудад үнэ төлбөргүй эмнэлгийн тусламж, үйлчилгээ үзүүлэх ажлыг 2026 оны 8 дугаар сард зохион байгууллаа. Хамтарсан эмнэлгийн баг нийт 34 өвчтөнд үзлэг, оношилгоо хийж, уруул, тагнайн сэтэрхийтэй 20 хүүхдэд мэс заслын эмчилгээ амжилттай хийв.
Нордхоффын гавал, нүүрний сан нь Монгол Улсад олон жилийн турш уруул, тагнайн сэтэрхийн эмгэгтэй хүүхэд, багачуудад эмнэлгийн тусламж, үйлчилгээ үзүүлэх ажлыг зохион байгуулсаар ирсэн. Тус сангийн анхны эмнэлгийн баг 2010 оны 8 дугаар сард Монгол Улсад хүрэлцэн ирж, түүнээс хойш эдүгээ 16 дах жилдээ эмнэлгийн тусламж, үйлчилгээ үзүүлэх үйл ажиллагаагаа тасралтгүй хэрэгжүүлж байна. Энэ хугацаанд Монгол Улсын 300 гаруй хүүхдэд уруул, тагнайн сэтэрхийг нөхөх мэс заслыг үнэ төлбөргүй хийж, олон бяцхан хүүхдэд эрүүл, сайхан инээмсэглэл бэлэглэжээ. Үүний зэрэгцээ Нордхоффын гавал, нүүрний сан нь Монгол Улсын Эх, хүүхдийн эрүүл мэндийн үндэсний төвийн эмнэлгийн мэргэжилтнүүдийн мэдлэг, ур чадварыг дээшлүүлэх, мэргэжил арга зүйн чадавхыг бэхжүүлэх сургалтыг тогтмол зохион байгуулж ирсэн байна. Энэ хүрээнд тус төвийн нийт 13 эмнэлгийн мэргэжилтнийг Тайваний Чан Гэн эмнэлэгт мэргэжил дээшлүүлэх сургалтад хамрагдахад нь дэмжлэг үзүүлжээ.
2026 оны 8 дугаар сарын 27-ны өдөр Тайваниас Монгол Улсад суугаа төлөөлөгч Ван Кай-Ю “Хайраар нөхөе – Монгол орны уруул, тагнайн сэтэрхийн эмгэгтэй хүүхэд, багачуудад эмнэлгийн тусламж, үйлчилгээ үзүүлэх эмнэлгийн багт зориулсан Талархлын цайны үдэшлэг”-т урилгаар оролцов. Тус арга хэмжээг Тайваний эмнэлгийн тусламж, үйлчилгээний бодит үр дүн, ач холбогдлыг олон нийтэд таниулахын зэрэгцээ Монгол Улсад эмнэлгийн тусламж, үйлчилгээ үзүүлж буй эмнэлгийн багийн үйл ажиллагаанд талархал илэрхийлэх зорилгоор зохион байгуулсан юм.
Төлөөлөгч Ван Кай-Ю олон улсын хүмүүнлэгийн үйлс, эмнэлгийн тусламж, үйлчилгээнд үнэтэй хувь нэмэр оруулсаар ирсэн Нордхоффын гавал, нүүрний санд талархал илэрхийлэв. Тус сан нь олон жилийн турш Чан Гэн эмнэлэгтэй хамтран Монгол Улсад уруул, тагнайн сэтэрхийтэй хүүхдүүдэд үнэ төлбөргүй мэс заслын эмчилгээ үзүүлж ирсэн бөгөөд энэхүү энэрэнгүй үйлс нь Монгол Улсын эрүүл мэндийн салбарт бодит хувь нэмэр оруулж, Тайвань Монголын эрүүл мэндийн салбарын хамтын ажиллагааны сайхан жишээ болж байна. Нордхоффын гавал, нүүрний сан болон Чан Гэн эмнэлэг цаашид ч Монгол Улсад үнэ төлбөргүй эмнэлгийн тусламж, үйлчилгээ үзүүлж, уруул, тагнайн сэтэрхийтэй хүүхдүүдэд сайхан инээмсэглэл, амьдралын итгэл найдвар бэлэглэн, тэдний гэр бүлд аз жаргал, баяр баясал авчрах шинэ хуудсыг нээнэ гэдэгт найдаж буйгаа илэрхийлэв.
