Улаанбаатар дахь Тайваний Төлөөлөгчийн газар нь 10-р сарын 8-ны өдрийн орой Улаанбаатар зочид буудалд энэ жилийн үндэсний баярын ойн арга хэмжээгээ зохион байгуулсан билээ. Уг баярын арга хэмжээнд Монгол Улсын улс төр, бизнес, боловсрол, хэвлэл мэдээлэл болон эмнэлэг, урлаг зэрэг салбаруудын хүндтэй зочид хүрэлцэн ирсэн төдийгүй МУ-д ажиллаж амьдарч буй Тайвань бизнес эрхлэгчид ч мөн адил хүрэлцэн ирсэн билээ. Ийнхүү 200 гаруй хүмүүс цуглан Тайвань орон мэндэлсний 109 жилийн ойн баярыг хамтдаа тэмдэглэв.
Энэ жилийн баярын арга хэмжээнд Тайваний хүүхэд гэр бүлийг дэмжих санг төлөөлөн морин хуурч Тайваний үндэсний аяз болох “Хаврын салхийг санагалзахуй” аязаар нээлтийн мэндчилгээ дэвшүүлж хүрэлцэн ирсэн зочдын сонорыг мялаасан. Морин хуурч хүүхэд нь Тайваний хүүхэд гэр бүлийг дэмжих сангийн авъяас чадвар дээшлүүлэх ангийн гишүүн сурагч юм.
Тайваниас Монгол улсад суугаа төлөөлөгч Грэйс Ж.Р.Лүө нь “Тайвань цар тахлын халдвар тархахаас амжилттай урьдчилан сэргийлж байгаа тул дэлхийн олон орны удирдлагын зүгээс Тайвань орныг өндрөөр үнэлэн, сайшааж байна. Иймээс ч Тайваний ерөнхийлөгч Цай Ин Вэнь-ийг Таймс сэтгүүлээс 2020 оны хамгийн нөлөө бүхий 100 хүний нэг хэмээн нэрлэсэн билээ. Цар тахал дэгдээд байгаа энэ цаг үед Тайваний ард иргэд хэвийн амьдралын хэв маягаа алдалгүй аж төрж байна. Энэ онд Тайваний эдийн засгийн өсөлт 1.75% -д хүрч, Азийн дөрвөн бар улсыг эдийн засгийн өсөлтөөрөө тэргүүлэх төлөвтэй байна. Тайваний хичээл зүтгэл олон улсын дэмжлэгийг илүү их хүртсээр байгаа ба АНУ-ын ЭМЯ-ны сайд Алекс Азар, Бүгд Найрамдах Чех Улсын Парламентын тэргүүн Милош Выстрчил, АНУ-ын төрийн департментын нарийн бичгийн дарга Кэйт Крач, Япон улсын ерөнхий сайд асан Мори Ёширо тэргүүтэй хүндтэй зочид Тайваньд айлчилсан. Мөн түүнчлэн энэ оны ДЭМБ-ын ерөнхий ассамблейн цахим хуралдааны үеэр дэлхийн нийт 43 улс орон Тайванийг ДЭМБ-ын ерөнхий ассамблейд оролцохыг дэмжиж буйгаа илэрхийлэв.
Үүнээс гадна Тайвань Монгол хоёр орон цар тахлын эсрэг өндөр үр дүнтэй арга хэмжээ авч хэрэгжүүлж буй нь дэлхий нийтэд хүлээн зөвшөөрөгдсөн. Цар тахлаас урьдчилан сэргийлэх тухай хамтын ажиллагааг сайжруулахын тулд Тайваний Засгийн Газраас МУ-д 5,000 ширхэг тусгаарлалтын бүсэд ашиглах эмнэлгийн зориулалтын хамгаалах хувцас болон 20,000 ширхэг халдвар хамгааллын хувцас, мөн 200,000 ширхэг эмнэлгийн зориулалтын амны хаалт хандивлаж, “Тайвань тусалж чадна, Тайвань тусалж байна” /Taiwan Can Help, Taiwan is Helping/ гэдгээ батлан харууллаа. МУ цар тахлаас урьдчилан сэргийлэх ажлын хүрээнд гаргасан амжилтыг Тайваний Засгийн Газрын зүгээс өндрөөр үнэлж, шинэ төрлийн коронавирусийн эрсдэл багатай улс орнуудын жагсаалтанд багтааж, МУ-ын бизнес эрхлэгчид, оюутан залуусыг өөрийн орны хилээр нэвтрүүлж байгаа билээ. Бизнес эрхлэгчид Тайваньруу зорьчсон тохиолдолд ердөө 5 өдөр тусгаарлагдах шаардлагатай. Иймд Монгол бизнес эрхлэгчид, оюутан залуусыг энэхүү завшааныг ашиглахыг уриалъя. Цар тахал дууссаны дараа хоёр орны бүхий л салбарууд дахь хамтын ажиллагаа улам илүү батжина гэдэгт найдаж байна” хэмээн санал бодлоо хуваалцлаа.
Энэ жилийн баярын арга хэмжээний үеэр зураач Б.Бямбааг тусгайлан урьсан. Зураач Бямбаа нь Тайваний үндэсний “Тайнан урлагийн их сургууль”-г магистрын зэргээр сурч төгссөн бөгөөд түүний Тайваньд байхдаа зурсан уран бүтээлүүдийг “Миний Тайваньд сурсан урлаг” хэмээх нэрийн дор уг арга хэмжээний нэг хэсэг болгон хүрэлцэн ирсэн зочдод танилцуулав. Ингэснээр Монгол залуусыг Тайваньд дээд боловсрол эзэмшин, эрдмийн зэрэг өвөртлөхийг уриалав. Тайвань жендерийн эрх тэгш байдал, эмэгтэйчүүдийн сургалт хөтөлбөр болон боловсролд чухал анхаарал хандуулдгийг илтгэн харуулахын тулд төлөөлөгчийн газрын зүгээс "Азийн охидын шагнал" -ын эзэн Базарын Оюунбилэгийг урьж оролцуулснаар Монгол охид эмэгтэйчүүдийг өөрийн хүсэл зорилгын төлөө тууштай тэмцэх ёстой гэдгийг уриалав.
