Тайваний Сувилагчдын нийгэмлэг болон Монголын Сувилагчдын нийгэмлэг хамтран ажиллах санамж бичигт гарын үсэг зурах ёслолын арга 2022 оны 6-р сарын 22-ны өдөр цахим хэлбэрээр зохион байгуулагдаж, Тайваний Сувилагчдын нийгэмлэгийн тэргүүн Чэнь Жин Мин болон Монголын Сувилагчдын нийгэмлэгийн тэргүүн Д.Нямсүрэн нар талуудыг төлөөлөн санамж бичигт үсэг зурав. Энэхүү ёслолын арга хэмжээний үеэр Тайпэйн Худалдаа, Эдийн Засгийн Улаанбаатар дахь Төлөөлөгчийн газрын Төлөөлөгч Грэйс Ж. Р.Лүө, Тайпэй дахь Улаанбаатарын Худалдаа, эдийн засгийн төлөөлөгчийн газрын төлөөлөгч Л. Золзаяа нар энэхүү баярт үйл явдлыг гэрчилж, баяр хүргэж үг хэлсэн төдийгүй Тайваний Гадаад харилцааны яам, Тайваний Эрүүл мэнд, халамжийн яам болон МУ-ын Эрүүл мэндийн яамны албаны төлөөллүүд оролцож, үг хэллээ.
Тайваний Сувилагчдын нийгэмлэгийн тэргүүн Чэнь Жин Мин хэлсэн үгэндээ “Монгол Улс бол Тайваний чухал анд нөхөр бөгөөд манай хоёр нийгэмлэг бол Олон улс сувилагчдын нийгэмлэг (ICN)-ийн гишүүн орнууд билээ. Хамтын ажиллагааны хүрээнд олон улсын бага хурал, семинар, зөвлөгөөн болон бусад сувилахуйн мэргэжлийн чадавхийг бэхжүүлэх сургалтын хөтөлбөрүүдэд хамрагдах, мэргэжлийн мэдлэг, мэдээлэл хуваалцах, мэдээлэл солилцох, судалгаа, эрдэм шинжилгээний материалуудыг солилцох, сувилахуйн мэргэжлийн үнэлэмжийг нэмэгдүүлэх замаар бодит харилцаа, хамтын ажиллагааг бэхжүүлэх үр дүнтэй хамтын ажиллагааны сувгийг бий болгох зорилгоор хоёр талын уулзалтуудыг тогтмол зохион байгуулах зэрэг багтана.
Монголын Сувилагчдын нийгэмлэгийн тэргүүн Д.Нямсүрэн хэлсэн үгэндээ “Тайвань Монголын эрүүл мэндийн салбарын хамтын ажиллагаа, хүний нөөц, боловсолн хүчний харилцан солилцоо, сургалт семинарт хамруулах чиглэлээр улам бүр өргөжинө гэдэгт итгэлтэй байна. Тайваньчууд удаан хугацааны турш Монгол Улсын эрүүл мэндийн салбарын хөгжлийг ахиулах чиглэлээр дэмжлэг үзүүлсээр ирсэн. Энэ удаад бид санамж бичигт хамтран гарын үсэг зурсан явдал нь Тайвань Монголын сувилагч мэргэжилтнүүдийн харилцаа, хамтын ажиллагааг өргөжүүлэхэд энэ чухал ач холбогдолтой юм” гэж онцлов.
Тайваниас Монгол Улсад суугаа төлөөлөгч Грэйс Ж. Р.Лүө хэлсэн үгэндээ “Тайвань Монгол хоёр орон эрүүл мэндийн салбарт ойр нягт хамтран ажиллаж, туршлага харилцан солилцсоор ирсэн. Тайваньчууд өнгөрсөн жилүүдэд Монгол орны 1000 гаруй эмнэлгийн мэргэжилтнүүдийг сургалт семинарт хамруулснаас гадна эмнэлгийн тоног төхөөрөмж, эмнэлгийн хэрэгслүүд, халдвар хамгааллын хэрэгсэл Монгол Улсад хандивлаж байсан. Тайваньчууд Монгол Улстай эрүүл мэндийн салбар дахь туршлагаасаа хуваалцахад бэлэн байгаа бөгөөд хоёр орны сувилагчдын нийгэмлэгүүд хамтран ажиллах санамж бичигт гарын үсэг зурсанаар Тайвань, Монголын эрүүл мэндийн салбарын харилцаа, хамтын ажиллагаа өргөжин хөгжиж, шинэ түвшинд хүрнэ гэдэгт итгэлтэй байна.” гэв.
